ಬಿತ್ತನೆ ಬೀಜ ಕೊರತೆ, ಅಸಮರ್ಪಕ ಗೊಬ್ಬರ ಪೂರೈಕೆ ಅಲ್ಲಗಳೆದ ಬೈರೇಗೌಡ

Krishna-Biregowda

 
* ಕಂಚೀಕೈ ವಿರೂಪಾಕ್ಷ ಹೆಗಡೆ, ಬೆಳಗಾವಿ ಪ್ರಸಕ್ತ ಮುಂಗಾರು ಹಂಗಾಮಿನಲ್ಲಿ ರಿಯಾಯಿತಿ ಯೋಜನೆಯಡಿ ವಿವಿಧ ಕೃಷಿ ಬೆಳೆಗಳ ಒಟ್ಟ 4.90 ಲಕ್ಷ ಕ್ವಿಂಟಲ್‌ನಷ್ಟು ಬಿತ್ತನೆ ಬೀಜ ವಿತರಣೆಗೆ ಸರಕಾರ ಸಿದ್ಧತೆ ಮಾಡಿಕೊಂಡಿದೆ. ಈವರೆಗೆ 2.42 ಲಕ್ಷ ಕ್ವಿಂಟಲ್‌ನಷ್ಟು ಬಿತ್ತನೆ ಬೀಜಗಳು ವಿತರಣೆ ಮಾಡಲಾಗಿದೆ ಎಂದು ಕೃಷಿ ಸಚಿವ ಕೃಷ್ಣ ಬೈರೇಗೌಡ ಅವರು ತಿಳಿಸಿದ್ದಾರೆ.

”ಈಗಾಗಲೇ ಬೇಡಿಕೆಯಂತೆ ಪೂರೈಕೆ ಮಾಡುತ್ತಿದ್ದು ಇನ್ನೂ 1.39 ಲಕ್ಷ ಕ್ವಿಂಟಲ್ ಬಿತ್ತನೆ ಬೀಜಗಳು ದಾಸ್ತಾನಿದೆ. ಯಾವುದೇ ಕೊರತೆ ಗಮನಕ್ಕೆ ಬಂದಿಲ್ಲ, ಅಧಿಕೃತ ಮಾರಾಟಗಾರರು, ಪ್ರಾಥಮಿಕ ಪತ್ತಿನ ಸಹಕಾರಿ ಸಂಘಗಳು, ರೈತ ಸಂಪರ್ಕ ಕೇಂದ್ರಗಳ ಮೂಲಕ ಸಕಾಲದಲ್ಲಿ ವಿತರಣೆಗೆ ಕ್ರಮಕೈಗೊಳ್ಳಲಾಗಿದೆ,” ಎಂದು ಅವರು ವೀರಣ್ಣ ಮತ್ತಿಕಟ್ಟಿ ಕೇಳಿದ ಪ್ರಶ್ನೆಗೆ ಉತ್ತರಿಸಿದರು.

”ಕೇಂದ್ರ ಸರಕಾರದಿಂದ ಜೂನ್ ಅಂತ್ಯದವರೆಗೆ 13.44 ಲಕ್ಷ ಕ್ವಿಂಟಲ್ ರಸಗೊಬ್ಬರ ಹಂಚಿಕೆಯಾಗಿದೆ. ಅದರಲ್ಲಿ 9.54 ಲಕ್ಷ ಟನ್ ಸರಬರಾಜು ಆಗಿದ್ದು, 4.62 ಲಕ್ಷ ಟನ್ ದಾಸ್ತಾನಿದೆ. ಎಲ್ಲ ಜಿಲ್ಲೆ, ತಾಲೂಕು, ಹೋಬಳಿ ಮಟ್ಟದಲ್ಲಿ ರಸಗೊಬ್ಬರ ಪರಿವೀಕ್ಷಕರು ಮತ್ತು ಜಿಲ್ಲಾ ಮಟ್ಟದಲ್ಲಿ ಸಹಾಯಕ ಕೃಷಿ ನಿರ್ದೇಶಕರ ನೇತತ್ವದಲ್ಲಿ ರಚಿಸಿರುವ ಜಾಗ್ರತ ದಳದವರು ನಿಯಮಿತವಾಗಿ ರಸಗೊಬ್ಬರ ಮಾರಾಟ ಮಳಿಗೆಳಿಗೆ ಭೇಟಿ ನೀಡಿ ತಪಾಸಣೆ ನಡೆಸುತ್ತಿದ್ದಾರೆ ಸಮರ್ಪಕ ರೀತಿಯಲ್ಲಿ ಗುಣಮಟ್ಟದ ರಸಗೊಬ್ಬರ ಪೂರೈಕೆಗೆ ಕ್ರಮ ಕೈಗೊಳ್ಳಲಾಗಿದೆ,” ಎಂದು ವಿಧಾನಪರಿಷತ್‌ಗೆ ಮಾಹಿತಿ ನೀಡಿದರು.

ಇನ್ನೊಂದು ಪ್ರಶ್ನೆಗೆ ಉತ್ತರಿಸಿದ ಸಚಿವರು, ”ಕರ್ನಾಟಕ ರಾಜ್ಯ ಸಹಕಾರ ಮಹಾಮಂಡಳಕ್ಕೆ ಸರಕಾರ ನೀಡಿದ ಹಣವು ಸದ್ಬಳಕೆ ಆಗುತ್ತಿಲ್ಲ ಎನ್ನುವದನ್ನು ಅಲ್ಲಗಳೆದಿದ್ದಾರೆ. ಮಹಾಮಂಡಳವು ಅವಶ್ಯಕ ರಸಗೊಬ್ಬರಗಳನ್ನು ಖರೀದಿಸಿ ಗ್ರಾಮೀಣ ಭಾಗದ ಸಹಕಾರಿ ಸಂಘಗಳ ಮೂಲಕ ರೈತರಿಗೆ ವಿತರಣೆಯ ಕಾರ್ಯ ಸಮರ್ಪಕವಾಗಿ ನಿರ್ವಹಿಸುತ್ತಿದೆ,” ಎಂದರು.

ಶೇಂಗಾ ಬೀಜಕ್ಕೆ ಪರದಾಟ ಚಿತ್ರದುರ್ಗ ಜಿಲ್ಲೆಯ ಪ್ರಮುಖ ಬೆಳೆ ಶೇಂಗಾ ಬಿತ್ತನೆ ಬೀಜಕ್ಕೆ ಈಗ ರೈತರು ಪರದಾಡುತ್ತಿರುವುದು ಸರಕಾರದ ಗಮನಕ್ಕೆ ಬಂದಿದೆಯೇ? ಎನ್ನುವ ಶಾಸಕ ಜೆ.ರಘು ಆಚಾರ ಪ್ರಶ್ನೆಗೆ ಕಷಿ ರಾಜ್ಯ ಸಚಿವರು ಉತ್ತರ ನೀಡಿದ್ದು ಹೀಗೆ- ಕಳೆದ ವರ್ಷ 18,221 ಕ್ವಿಂಟಲ್ ಶೇಂಗಾ ಬಿತ್ತನೆ ಬೀಜ ಪೂರೈಸಲಾಗಿತ್ತು. ಪ್ರಸಕ್ತ ವರ್ಷ ಉತ್ತಮ ಬೆಳೆಯಿಂದ ಬೇಡಿಕೆ ಹೆಚ್ಚಾಗಿದೆ. ಈವರೆಗೆ 36,000 ಕ್ವಿಂಟಲ್ ಬೇಡಿಕೆಗೆ ಪ್ರತಿಯಾಗಿ 29,383 ಕ್ವಿಂಟಲ್ ಪೂರೈಸಲಾಗಿದೆ. ಇನ್ನಷ್ಟನ್ನು ರಾಜ್ಯ ಬೀಜ ನಿಗಮ, ಎಣ್ಣೆಕಾಳು ಒಕ್ಕೂಟದ ಮೂಲಕ ಪೂರೈಕೆಗೆ ಕ್ರಮವಹಿಸಲಾಗಿದೆ. —–

ಕೀಟನಾಶಕ ಕಾಯ್ದೆ 1968 ಹಾಗೂ ಕೀಟನಾಶಕ ನಿಯಮ 1971ರ ಅನ್ವಯ ತಯಾರಕರು ಹಾಗೂ ಮಾರಾಟಗಾರರ ಮೇಲೆ ಆಡಳಿತಾತ್ಮಕ ಹಾಗೂ ಕಾನೂನು ಕ್ರಮ ಕೈಗೊಳ್ಳಲಾಗುತ್ತದೆ. -ಕೃಷ್ಣ ಬೈರೇಗೌಡ, ಕಷಿ ರಾಜ್ಯ ಸಚಿವ.